ፈጠራዊ ኣጸሓሕፋ መጽሓፍ

ዝኸበርኩም ኣሓት ኣሕዋት። እንቋዕ ብድሓን መጻእኩም።

ኣሮን ብርሃነ ይበሃል። ኣብ ሓደ ካብቶም ዓበይቲ ኮለጃት ካናዳ ከም መምህር ኮይነ ይሰርሕ። ንኣብ ኮለጃት ወይ ዩኒቨርስቲ ዝወሃብ ህቡብ ኮርስ ፈጠራዊ ኣጸሓሕፋ ደረጃ ብደረጃ ልቢ ወለድ፡ ናብ ህዝብና ንምብጻሕ፡ ነቲ ካሪክሉም ናብ ቋንቋ ትግርኛ ተርጊመ ኣቕሪበዮ ኣለኹ። ሰለዚ እዚ ኮርስ’ዚ ናይ ኮለጅ ወይ ዩኒቨርስቲ ኮርስ’ዩ። እቲ ሓደ ፍሉይነቱ ብቋንቋ ትግርኛ ይወሃብ ምህላዉ ጥራሕ’ዩ።

ነዚ ክሳብ ሕጂ ኣብ ህይወትኩም ዝሓለፍኩሞ መሰናኽላት ኣብ መጽሓፍ ከተስፍርዎ ሓሲብኩም ዶ ትፈልጡ? ወይ ነዚ መዓልታዊ ትዕዘብዎ ዘይፍትሓውነት ንሕሉፍ ወለዶ ክኸውን ክትስንድዎ ትሕልኑ ዶ? ወይ ውን ክትጽሕፉ ጀሚርኩም ግን ኣብ መወዳእታ ከይበጻሕኩም ኣቋሪጽኩም ዶ ትፍፈልጡ? ሓደ ንድፊ መጽሓፍኩም ወዲእኩም ናብ ዝኾነ ካልእ ከየካፈልኩም ኣብ ከብሒ ገዛኹም ኣቐሚጥኩሞ ዶ ትህልዉ?

እዚ ናይ ብዙሓት ብድሆ’ዩ። ሓንሳብ ስራሕ ይገፍሕ፡ ሓንሳብ ውን ካልእ ቀዳምነት ዝወሃቦ ጉዳይ ይርከብ፡ ወይ ድማ በየን ጀሚርካ በየን ከምትውድእ ስለዝሕርብት ክኸውን ይኽእል። እቲ ምኽንያት ዝኾነ ይኹን፡ እዚ ኮርስ’ዚ ነታ ኣብ ሓንጎልኩም ዘላ ሓሳብ መጽሓፍ ብከመይ መንገዲ ደረጃ ብደረጃ ኣብ መዛዘሚ ተብጽሕዋ ዘሳሊ ፈጠራዊ ኣጸሓሕፋ ኮርስ’ዩ። መጽሓፍ ዘሕተመ ይኹን ወይ ውን ንመጀርታ ግዜ መጽሓፍ ክጽሕፍ ዝሕልን ሰብ እዚ ኮርስ ዘድልዮ ፍልጠት መስርሓት ምጽሓፍ ደረጃ ብደረጃ ከስንቖ’ዩ።

ዝኾነ ብዕቱብ ነዚ ኮርስ ካብ መጀመርታ ክሳብ መወዳእታ ዝተኸተሎ፡ ኣብ ውሽጢ ሽዱሽተ ኣዋርሕ፡ ቀዳመይቲ ንድፊ መጽሓፉ ክውድእ ይኽእል’ዩ።

ንኩሎም ንምጽሓፍ ዘድልዩ መስርሓት ሓደ ብሓደ ኣብዚ ክንዝትየሎም ኢና። ዝተፈላለዩ ዕዮ ገዛ እናሃብና ወይ በዳሂ ሕቶታት እናቕብና ኣብቲ ናይ ምጽሓፍ ስራሕ ምሉእ ብምሉእ ከምትጥሕሉ ክንገብር ኢና። ካብ ምምንጫው ሓሳብ ክሳብ ምሕታም መጽሓፍ ንምብጻሕ ክሕግዝ ዝኽእል ኣገባባትን ኣስተምህሮን ኣብዚ ኮርስ’ዚ ሓደ ብሓደ ክንርእዮ ኢና።

ኣብዚ ኮርስ’ዚ ንመሃሮ ዓንቀጻት፥

• መጽሓፍ ብከመይ ትጽሕፍ
• ንድፊ
• ቅርጺ ዛንታ
• ውጥን (ፕሎት) ዛንታ ኣብ ሰለስተ ክፋላትን 9 ጨንፈራትን ብምጉዛይ
• ምምዕባል ጠባያት

እዞም ሓሙሽተ ዓንቀጻት ነፍስ-ወከፎም ሓሓሙሽተ ምዕራፋት ኣለዎም። ስለዚ ካብቲ ጉዙፍ ኣርእስቲ ናይቲ ዓንቀጽ ጀሚርና ነቶም ምዕራፋት ሓደ ብሓደ ብዝርዝር እናኣተና ክንርእዮም ኢና። ምናልባት ነዚ ቪድዮ ደጊምኩም ክትርድእዎ ዘይክኣልኩም ነገራት እንተሎ፡ ብመንገዲ ኢመይ ክትሓቱ ትኽእሉ። ኣብዚኣ ብሓባር ኮይና፡ ነዚ ክሳብ ሕጂ ኣብ ሃገርና ዝተፈጸመ ታሪኻ፡ ጅግነንት ይኹን ክድዓት፡ በለጽ ይኹን ርህራሀ ብመክልዕ ልቢ ወለድ ወይ ውን ሓቀኛ ዛንታ እናጸሓፍና ንመጻኢ ወለዶ ምእንቲ ከነሕልፎ፡ ነዚ መሰረታዊ ፍልጠት ኣጸሓሕፋ መጽሓፍ ተማሂርና ምጽሓፍ ክንጅምር ኣለና።

ስለዚ ነፍስ-ወከፍ ዓንቀጽ፥ ምዕራፍ ወይ ንኡስ ምዕራፍ ብኣንክሮ ተኸታተልዎ። ውጽኢት ፍር-ጻዕርኹም ምእንቲ ክትርእዩ ነቲ ዝወሃብ ዕዮ ገዛታት ብጥብቂ ስርሕዎ። ነቲ መደረ ናይቲ ቪድዮ ደጋጊምኩም ኣኾምስዕዎ። ከምዚ እንተጌርኩም ነቶም መሰረታውያን ፍልጠታት ጽቡቕ ጌርኩም ስለትጭብጥዎም፡ ብሉጽ መጽሓፍ ክትጽሕፉ ክትክእሉ ኢኹም።